Sentyabr ayının 2-ci dekadası üzrə Aqrometeoroloji bülleten

 Respublikanın əksər bölgələrində sentyabr ayının ikinci ongünlüyü az yağıntılı hava şəraiti və havanın orta temperaturunun çoxillik iqlim normasından 2-4ºC yüksək olması ilə səciyyələnmişdir.
Havanın dekadalıq orta temperaturu Maştağada 23.7ºC, Naxçıvanda 24.5ºC, Mil-Muğan və Mərkəzi Aranda 24-25ºC, Gəncə-Goranboy 23-25ºC, Qarabağ bölgəsi 23-25ºC , Şəki-Zaqatalada 22-23ºC, Dağlıq Şirvan bölgəsində və Qubada 20-21ºC, Lənkəran-Astarada 21-25ºC, Tovuz-Qazaxda 17-23ºC təşkil etmişdir.


Havanın minimum temperaturu Gədəbəydə 9ºC, Naxçıvan, Quba, Acınohur və İsmayıllıda 12ºC, Şamaxıda 13ºC, Zaqatala və Ceyrançöldə 14ºC, Şəki və Tovuzda 15ºC, Cəfərxan, Bərdə, Lənkəran, Gəncə və Maştağada 16ºC, Zərdab və Göyçayda 17-18ºC qeydə alınmışdır.
Torpaq səthinin minimum temperaturu Ceyrançöl və Naxçıvanda 10ºC, Zaqatalada 11ºC, Tovuz və Cəfərxanda 12ºC, Gəncədə 13ºC, Şəkidə 14ºC,Göyçayda 18ºC qeydə alınmışdır.
Yağıntının dekadalıq miqdarı Oğuzda 9 mm, Qubada 7mm, Balakəndə 6 mm qeydə alınmışdır.


Nisbi rütubət Dağlıq Şirvan bölgəsində 59-65%, Gəncədə 65%, Qazax-Tovuz bölgəsində 54-68%, Lənkəran-Astara bölgəsində 69-82%, Mil-Muğanda 60-78%, Şəki-Zaqatalada 59-63%, Qubada 65%, Mərkəzi Aranda 63-69%, Maştağada 75%, Qarabağda 60-63% təşkil etmişdir.
Rütubət çatışmazlığı Gəncədə 11 hPa, Lənkəran və Astarada 6-10 hPa, Şəki-Zaqatala və Bərdə-Tərtərdə 12-13 hPa, Dağlıq Şirvanda 9-11 hPa, Maştağada 8 hPa, Qubada 10 hPa, Mərkəzi Aranda 10-12 hPa, Mil-Muğanda 8-14 hPa, Qazax-Tovuzda 7-13 hPa olmuşdur.
Sürəti 15 m/san-dən yuxarı olan küləkli günlərin sayı 2 gün Goranboyda maksimum sürət 26 m/san, Ceyrançöldə maksimum sürət 20 m/san, Maştağada 18 m/san, 1 gün Tərtərdə maksimum sürət 25 m/san, Şəki və Göyçayda 20 m/san, Gəncədə 18 m/san, Bərdədə 15 m/san müşahidə edilmişdir.


Kənd təsərrüfatı bitkilərinin vəziyyəti

Dekada ərzində Cəfərxan, Beyləqan, Sabirabad, İmişli, Goranboy, Tərtər, Gəncə və Biləsuvarda pambıq bitkisində ilk qozalarda pambıq xammalının yetişməsi fenoloji mərhələsi, Bərdədə isə müşahidə sahəsində məhsulun 2-ci yığımı qeydə alınmışdır. Cəfərxan, Bərdə, Tərtər, və Goranboyda bir pambıq bitkisində formalaşmış qozaların orta sayı 13-17 ədəd, açılmış və yetişmiş qozaların sayı 8-10 ədəd təşkil etmişdir. Əksər aran və dağətəyi rayonlarda, fındıq, alma, üzüm, armud kimi ağaclarda meyvələrin yetişməsi və yığımı davam etmişdir. Lənkəran-Astara bölgəsində feyxoa ,naringi kimi sitrus və subtropik bitkilərdə budaqların 3-cü boy atması müşahidə edilmişdir. Zaqatalada çay kollarında 5-ci dərəcəli məhsuldar budaqların çıxması fenoloji mərhələsi,Balakən və Zaqatalada tütün bitkisində yuxarı yarusdakı yarpaqların texniki yetişkənliyi və yığımı qeydə alınmışdır. Gəncə, Tovuz, Şəki və Cəfərxanda yonca bitkisində 3-5-ci biçindən sonra otların boy atması davam etmişdir.