Dekabr ayı üçün aqrometeoroloji icmal

  Respublikanın əksər bölgələrində dekabr ayı nisbətən az yağıntılı hava şəraiti və temperaturun çoxillik iqlim normasından 1-3°C yüksək olması ilə səciyyələnmişdir
  Ayın birinci ongünlüyündə əksər aran və dağətəyi rayonlarda payızlıq dənli bitkilərdə cücərmə və göyərmə mərhələləri davam etmiş, Sabirabad və Ucarda arpa bitkisində, Göytəpədə buğda bitkisində kollanma fenoloji mərhələsi müşahidə edilmiş, Tovuz, Oğuz, Şəki, Yardımlıda buğda və arpa bitkilərində 3-cü yarpağın çıxması mərhələsi qeydə alınmışdır. 1m2 sahədə olan bitkilərin sayı Sabirabadda 470, Göytəpədə 416, Şəkidə 164, Oğuzda 152 ədəd təşkil etmiş, kollanma mərhələsində bitkilərin hündürlüyü 12-16 sm müşahidə edilmişdir. İkinci və üçüncü ongünlüklərdə bitkilərdə cücərmə, göyərmə, 3-cü yarpağın çıxması,Ucar və Sabirabadda kollanma fenoloji mərhələləri davam etmiş, Goranboy, Tərtər,Qaraçalada buğum köklərinin yaranması qeydə alinmışdır. Sabirabad və Ucarda kollanma mərhələsində 1m2 sahəyə düşən bitkilərdə gövdələrin ümumi sayı 611-988 ədəd, kollanma dərəcəsi 2.1-2.2%, bitkilərin hündürlüyü 16-22 sm təşkil etmişdir. Ayın sonlarında havanın orta temperaturunun 2-3°C-dək düşməsi Şəki, Qəbələ, Oğuzda payızlıq dənli bitkilərdə vegetasiyasının dayanmasına səbəb olmuşdur
  Ay ərzində meyvə ağaclarında yarpaqların payız saralması və xəzan davam etmiş, Lənkəran-Astara bölgəsində subtropik bitkilərdə və çay kollarında boyatmanın dayanması qeydə alınmışdır.